फागुन,२६ हेटौंडा।देशभरका ३९ जिल्लामा ‘क्लिन स्वीप’ गर्दै विजयको नयाँ इतिहास रचेको राष्ट्रिय स्वतन्त्र पार्टी (रास्वपा) का लागि प्रदेश ‘क्लिनस्वीप’गर्न रौतहटको एउटा सिट ‘तगारो’ बनेको छ।

यदि रौतहट क्षेत्र नम्बर २ मा नेपाली कांग्रेसका उम्मेदवार फिर्दोश आलमले नजितेको भए, सिंगो मधेश प्रदेशका सबै ३२ निर्वाचन क्षेत्रमा रास्वपाको एकलौटी कब्जा हुने थियो।

​रौतहटको त्यो एउटा सिट: जहाँ रास्वपा चुक्यो

​मधेशका ८ जिल्लामध्ये ७ वटामा रास्वपाले विपक्षीलाई शून्यमा झारेको छ। सप्तरी, सिरहा, महोत्तरी, सर्लाही, बारा र पर्साका सबै क्षेत्रमा ‘घण्टी’ बाहेक अरु कुनै दलले टाउको उठाउन सकेनन्।

तर, रौतहट-२ मा कांग्रेस उम्मेदवार फिर्दोश आलमको जितले मधेश प्रदेशलाई पूर्ण रूपमा ‘रास्वपामय’ हुनबाट जोगाएको छ।

यदि रौतहटको यो क्षेत्रमा पनि रास्वपाले बाजी मारेको भए, मधेश प्रदेशको इतिहासमै पहिलोपटक कुनै एउटा दलले प्रदेशका सबै सिट बढारेर ‘शतप्रतिशत’ नतिजा निकाल्ने रेकर्ड बन्ने थियो।

स्मरण रहोस्: फिर्दोश आलम पूर्वमन्त्री तथा नेपाली कांग्रेसका नेता अफ्ताव आलमका छोरा हुन्।

रास्वपाले ‘क्लिन स्वीप’ गरेका ३९ जिल्लाको विवरण:
​मधेशको एकछत्र राज (रौतहट बाहेक): सप्तरी (४), सिरहा (४), महोत्तरी (४), सर्लाही (४), बारा (४), पर्सा (४) र धनुषाका सबै क्षेत्रमा रास्वपाको क्लिन स्वीप भएको छ।

उपत्यकामा ‘क्लिन बोल्ड’: काठमाडौंका १०, ललितपुरका ३ र भक्तपुरका २ गरी उपत्यकाका १५ वटै सिटमा रास्वपा विजयी बनेको छ।
​कोशी र बागमतीमा बर्चस्व: झापा (५), मोरङ (६), उदयपुर (२), ओखलढुङ्गा (१), चितवन (३), धादिङ (२), मकवानपुर (२), नुवाकोट (२), काभ्रे (२), सिन्धुली (२) र दोलखा (१) मा सबै सिट कब्जा।

गण्डकी र लुम्बिनीमा लहर: कास्की (३), तनहुँ (२), गोरखा (२), स्याङ्जा (२), बागलुङ (२), लमजुङ (१), पर्वत (१), रुपन्देही (५), दाङ (३), गुल्मी (२), बर्दिया (२), नवलपरासी पूर्व र पश्चिम (४), अर्घाखाँची (१) र प्युठान (१) मा पूर्ण जित।

सुदूरपश्चिममा किल्ला तोडियो: कैलाली (५), कञ्चनपुर (३), डडेल्धुरा (१) र बैतडी (१) मा विपक्षीलाई शून्य पार्दै रास्वपा विजयी।
​ऐतिहासिक धक्का
​यो निर्वाचन नतिजाले मधेशका स्थापित क्षेत्रीय दल र पुराना शक्तिहरूलाई ठूलो धक्का दिएको छ। रौतहटको त्यो एउटा सिट बाहेक सिंगो मधेश र देशका प्रमुख ३९ जिल्ला नै रास्वपाको पोल्टामा जानुले नेपाली राजनीतिमा ‘नयाँ युग’ को संकेत गरेको छ।