असार १८, निजगढ। बारामा चट्याङ लागेर एक १२ वर्षीया बालिकाको मृत्यु भएको छ भने एक महिला घाइते भएकी छिन्। जिल्लाको महागढिमाई नगरपालिका–९, प्रिपरा बिर्तामा बुधबार साँझ परेको चट्याङका कारण सो दुर्घटना भएको हो।
मृत्यु हुनेमा स्थानीय कपिलदेव साहकी १२ वर्षीया छोरी सन्जनाकुमारी दास रहेकी छिन्। साथै, सोही स्थानकी ३० वर्षीया सरितादेवी दास चट्याङबाट घाइते भएकी छिन्।
जिल्ला प्रहरी कार्यालय बाराका अनुसार बुधबार करिब ५:०० बजेको समयमा सन्जना र सरिता आफ्नै खेतबाट काम सकेर घर फर्किंदै गर्दा अचानक चट्याङ परेको थियो।
चट्याङका कारण गम्भीर घाइते भएकी सन्जनाको घटनास्थलमै मृत्यु भएको प्रहरीले जनाएको छ।
घाइते सरिता देवी दासलाई तत्काल उपचारका लागि प्रादेशिक अस्पताल कलैया लगिएको थियो। अस्पतालका अनुसार घाइते सरिताको अवस्था मध्यम थियो। प्राथमिक उपचारपश्चात् उनी डिस्चार्ज भई घर फर्किसकेकी छिन्।
घटनाको जानकारी प्राप्त हुनासाथ जिल्ला प्रहरी कार्यालय बाराबाट प्रहरी निरीक्षक विमल खतिवडाको कमाण्डमा टोली र प्रहरी चौकी तेलकुवाबाट समेत प्रहरी टोली घटनास्थल पुगेको थियो। प्रहरी टोलीले घटनास्थलको प्रारम्भिक अनुसन्धान तथा कानुनी प्रक्रिया पूरा गरी फर्किएको छ।
