भदौ ७, हेटौंडा। मकवानपुरको भिमफेदी गाउँपालिका वडा नम्बर ८ महादेवटारमा निर्माण भइरहेको तराई-मधेस फास्ट ट्र्याकमा काम गर्ने क्रममा लोडरको ठक्करबाट एक चिनियाँ नागरिकको घटनास्थलमै मृत्यु भएको छ।
शनिबार दिउँसो करिब २ बजेको समयमा भएको उक्त दुर्घटनामा परी चिनियाँ नागरिक ५१ वर्षीय गुओ फाङ्सुनको मृत्यु भएको हो।
प्रहरीका अनुसार, फास्ट ट्र्याक निर्माणको जिम्मा पाएको ‘चाइना रेलवे न. २ इन्जिनियरिङ ग्रुप कम्पनी लिमिटेडको तर्फबाट उनी गत वर्ष फागुन ३ गतेदेखि सुपरभाइजरको रूपमा कार्यरत थिए।
चीनको सिचुआन प्रान्त स्थायी घर भएका उनको राहदानी नम्बर EQ7I6873I रहेको छ भने जन्ममिति सन् १९७५ सेप्टेम्बर १५ उल्लेख छ।
घटनास्थलमा काम गर्ने क्रममा कञ्चनपुरको शुक्लाफाँटा नगरपालिका वडा नम्बर १ घर भई लोडर चालकका रूपमा कार्यरत ४८ वर्षीय गौरसिंह साउदले चलाएको लोडर गाडीले पछाडिबाट ठक्कर दिँदा उनी गम्भीर घाईते भएका थिए।
ठक्करबाट उनको घटनास्थलमै मृत्यु भएको जिल्ला प्रहरी कार्यालय मकवानपुरले जनाएको छ।
घटनालगत्तै प्रहरीले घटनास्थलको प्रारम्भिक अनुसन्धान तथा लास जाँच मुचुल्कासम्बन्धी सम्पूर्ण कानुनी प्रक्रिया पूरा गरेको छ।
मृतकको शव परीक्षणका लागि त्रिवि शिक्षण अस्पताल, महाराजगञ्ज, काठमाडौँको शवगृहमा राखिएको छ। घटनाबारे थप अनुसन्धान भइरहेको प्रहरीले जनाएको छ।
प्रतिक्रिया
सम्बन्धित खवर
