माघ२०,हेटौंडा। मकवानपुरमा भीरबाट लडेर एक महिला गम्भीर घाईते बनेकी छिन्।

जिल्लाको कैलाश गाउँपालिका-९ स्थित दमारढुंगा बस्ने ३७ वर्षिय माईलीमाया घलान घाँस काटन जाँदा भीरबाट लडेर गम्भीर घाईते भएकी मकवानपुर प्रहरीले जनाएको छ।

प्रहरीका अनुसार आईतवार (आज) बिहान ९ बजे घाँस काट्न जाँदा घलान भिरबाट अन्दाजी १५० मिटर तल खसी घाईते भएकी हुन्।
उनलाई आफन्तहरुले उपचारार्थ हेटौँडास्थित मकवानपुर सहकारी अस्पतालमा ल्याईएको छ।

घाईतेको टाउको र शरिरको बिभिन्न भागमा चोट लागेको र अवस्था गम्भीर रहेको प्रहरीले जनाएको छ।

उत्तरी मकवानपुरका स्थानहरुमा बर्षेनि भीरबाट खसेर दर्जनौं मानिसहरुको ज्यान जाने गरेको छ। आईतवार बिहान पनि राक्सिराङ गाउँपालिकामा एकजना पुरुषको भीरबाट खसेर ज्यान गएको थियो।