फागुन २ हेटौंडा।मकवानपुरको हेटौंडा उपमहानगरपालिका–५ पिप्ले स्थित कान्तिलोकपथ सडक खण्डमा शनिबार राति भएको सवारी दुर्घटनामा परी एक जनाको मृत्यु भएको छ ।
विहिवार राति करिब ९:५० बजेको समयमा सडक छेउमा पार्किङ गरी राखिएको ना ५ ख १८६१ नम्बरको रड लोड भएको ट्रकमा सानोपोखराबाट पिप्लेतर्फ जाँदै गरेको ना २९ प ७०७२ नम्बरको मोटरसाइकल ठोक्किएको थियो ।
दुर्घटनामा गम्भीर घाइते भएका मोटरसाइकल चालकलाई स्थानीयले तत्काल उपचारका लागि हेटौंडा अस्पताल पुर्याएका थिए । अस्पताल पुर्याएलगत्तै राति १०:०० बजे चिकित्सकले उनलाई मृत घोषणा गरेका हुन् ।
सुरुमा पहिचान नखुलेका मृतक हेटौंडा उपमहानगरपालिका–५ पिप्ले ढुङ्गेधारा बस्ने वर्ष ३५/३६ का सुवास थिङ रहेको प्रहरीको प्रारम्भिक अनुसन्धानबाट खुलेको छ ।
प्रहरीले दुर्घटनामा संलग्न मोटरसाइकल, ट्रक र ट्रक चालक स्याङ्जाको वालिङ नगरपालिका–२ बस्ने वर्ष ५५ का किसनबहादुर सार्कीलाई नियन्त्रणमा लिएको छ।
नियन्त्रणमा लिइएका चालक र सवारी साधनलाई आवश्यक कानुनी कारबाहीका लागि जिल्ला प्रहरी कार्यालय मकवानपुर पठाइएको वडा प्रहरी कार्यालय हेटौंडाले जनाएको छ ।
