काठमाडौँ, ११ कात्तिक ।महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्री सिता बादी र नेपाल प्रहरीका महानिरीक्षक (आईजीपी) दानबहादुर कार्कीबीच मन्त्रालयमा द्विपक्षीय भेटवार्ता भएको छ।
उक्त भेटमा जातीय भेदभाव तथा छुवाछुतको अन्त्य, महिला तथा बालबालिकामाथि हुने हिंसा नियन्त्रण र सीमान्तकृत समुदायको न्यायमा पहुँच अभिवृद्धि गर्ने विषयमा गहन छलफल भएको छ।
भेटवार्ताका क्रममा विशेषगरी जातीय भेदभाव र छुवाछुतका घटनामा संलग्न दोषीहरूलाई प्रचलित कानुनबमोजिम कडा कारबाहीको दायरामा ल्याउने र पीडितलाई शीघ्र न्याय दिलाउने विषयमा जोड दिइएको छ।
यसका लागि नेपाल प्रहरीमा रहेको दलित सहायता कक्षलाई थप सक्रिय र प्रभावकारी बनाउने, प्राप्त उजुरीहरूलाई संवेदनशीलताका साथ ग्रहण गर्दै शीघ्र अनुसन्धान तथा अभियोजन प्रक्रिया अगाडि बढाउने सहमति भएको छ।
साथै, प्रहरी कर्मचारी तथा अधिकारीहरूलाई नियमित तालिम र ब्रिफिङमार्फत जातीय विभेदविरुद्धको कानुनी व्यवस्था र पीडितमैत्री व्यवहारप्रति थप जिम्मेवार बनाइनेछ।
यसैगरी, महिला तथा बालबालिकामाथि हुने हिंसा र दुर्व्यवहार नियन्त्रण, जोखिममा रहेका बालबालिकाको संरक्षण, पुनर्स्थापना र पारिवारिक पुनर्मिलनलाई प्राथमिकता दिइने भएको छ।
यसका लागि महिला, बालबालिका तथा ज्येष्ठ नागरिक सेवा केन्द्रलाई स्थानीय तह र सम्बन्धित निकायहरूसँग समन्वय गराई थप सक्रिय बनाउने निर्णय गरिएको छ।
सीमान्तकृत समुदायका उजुरीलाई प्राथमिकता दिँदै पीडितको कानुनी उपचार र संरक्षणमा पहुँच सुनिश्चित गर्ने विषयमा समेत छलफल भएको छ।
त्यस्तै, सीमापारी बालबालिकाको ओसारपसार तथा मानव बेचबिखनको जोखिम न्यूनीकरण गर्न सीमा क्षेत्रमा जाँच तथा निगरानी कडा पारिने भएको छ।
यस कार्यका लागि स्थानीय बालकल्याण अधिकारी र स्थानीय तहसँग सहकार्य बढाउँदै सामाजिक सचेतना अभिवृद्धि गर्ने रणनीति तय गरिएको छ।
भेटवार्ताको अन्त्यमा, मन्त्रालय र नेपाल प्रहरीबीचको समन्वय र सहकार्यलाई अझ सुदृढ बनाएर हिंसापीडितको संरक्षण तथा सीमान्तकृत वर्गको अधिकार सुनिश्चित गर्न दुवै पक्ष प्रतिबद्ध रहेका छन्।
प्रतिक्रिया
सम्बन्धित खवर
