कार्तिक १९,हेटौंडा। बाराको जितपुरसिमरा उपमहानगरपालिका–२२, चुरियामाइ मन्दिर नजिकै हेटौँडा–पथलैया सडक खण्डमा भएको सवारी दुर्घटनामा परि एकजनाको मृत्यु भएको छ भने एकजना घाइते भएका छन्।
आज साँझ अन्दाजी १७:३५ बजेको समयमा बीरगञ्जबाट धादिङ तर्फ आउँदै गरेको ना ६ ख १४५८ नम्बरको कोइला लोड ट्रक र हेटौँडाबाट रौतहट तर्फ जाँदै गरेको प्र.२-०३-००९ प ७९११ नम्बरको मोटरसाइकल एक आपसमा ठक्कर खाई दुर्घटना भएको हो।
दुर्घटनामा मोटरसाइकल चालक,रौतहटको चन्द्रपुर नगरपालिका–७ नयाँ बस्ती बस्ने अन्दाजी २१ वर्षका नन्द किशोर दासको दुवै हात, दुवै खुट्टा र मुखमा चोट लागी अवस्था मध्यम रहेको छ। उनको हाल जिल्ला अस्पताल हेटौँडा, मकवानपुरमा उपचार भइरहेको छ।
त्यसैगरी, मोटरसाइकल पछाडि सवार जिल्ला सर्लाही बसवरिया गाउँपालिका–३ बस्ने अन्दाजी २१ वर्षका निराजन यादव शरीरको विभिन्न भागमा चोट लागि गम्भीर घाइते भएका थिए।
उनलाई साँझ १८:३० बजे जिल्ला अस्पताल हेटौँडा पुर्याइएकोमा चिकित्सकले जाँच गर्दा साँझ १८:३९ बजे मृत घोषणा गरेका थिए।
घटनाको खबर प्राप्त हुनासाथ इलाका प्रहरी कार्यालय अमलेखगञ्ज, बाराबाट प्रहरी वरिष्ठ नायब निरीक्षक प्रकाशकुमार खत्रीको कमाण्डमा ४ जनाको टोली घटनास्थलमा खटिई गई आवश्यक उद्धार कार्य गरेको थियो।
दुर्घटनामा संलग्न ट्रक र त्यसका चालक, जिल्ला मकवानपुर हेटौँडा उपमहानगरपालिका–५ कमाने बस्ने अन्दाजी ३० वर्षका दिपक घलेलाई इलाका प्रहरी कार्यालय अमलेखगञ्जले नियन्त्रणमा लिएको छ।
प्रतिक्रिया
सम्बन्धित खवर
