११,काठमाडौं।जेनजी अगुवा रविकिरण हमालले वर्तमान राजनीतिक संकटको समाधान सर्वपक्षीय सरकार गठन र संविधान पुनर्लेखनमार्फत मात्र सम्भव हुने विचार व्यक्त गरेका छन्।

काठमाडौंमा बीपी चिन्तन प्रतिष्ठानले आयोजना गरेको कार्यक्रममा आफ्नो धारणा राख्दै उनले अहिलेको सरकार कु प्रक्रियामार्फत बनेको हुँदा यसले देशमा थप अस्थिरता, अनिश्चितता र शासनप्रति अविश्वास बढाइरहेको बताए।

भाद्र २३ र २४ गते युवापुस्ताले सुरु गरेको विद्रोहलाई आत्मसात गर्ने कि नबुझेर कोट्याउने भन्ने प्रश्नमा उनले स्पष्ट चेतावनी दिँदै विद्रोहलाई अपमान गर्ने या कमजोर बनाउने कुनै पनि प्रयास स्वीकार्य नहुने धारणा राखे।

उनले सुशीला कार्की र ओम प्रकाश अर्याल नेतृत्वको समूहले राज्यविहिनताको अवसर लिएर सत्ता कब्जा गरेको आरोपसमेत लगाए।

सरकार बनेपछि देखिएका निर्णय र काण्डसम्बन्धी उदाहरण प्रस्तुत गर्दै किरणले अर्थमन्त्रीद्वारा डोल्मालाई दिइएको कर छुट,
ऊर्जामन्त्री कुलमान घिसिङले ४३ करोड घाटा हुनेगरी गरेको विद्युत् सम्झौता, १६–१७ वर्षका किशोरीलाई बेहोस बनाएर डिम्ब बिक्री गर्ने गिरोहलाई महान्यायाधिवक्ताद्वारा उन्मुक्ति, गृहमन्त्रीले काकालाई डीआइजी बनाउन दरबन्दी थपेको घटना, प्रधानमन्त्रीका स्वकिय सचिवले आफ्ना आसेपासेलाई दिइएको राजनीतिक नियुक्ति यी सबै घटना सरकारले भ्रष्टाचार र लुटतन्त्रलाई संस्थागत गरेको स्पष्ट प्रमाण भएको जिकिर गरे।

किरणले विद्यमान राजनीतिक दलभित्रका निष्ठावान तथा सुधारवादी नेताहरू, जेनजी पुस्ता र असन्तुष्ट जनसमुदायलाई एउटै मोर्चामा समेटेर सर्वपक्षीय सरकार निर्माण गर्दै संविधान पुनर्लेखनमा अघि बढ्नुपर्ने आफ्नो माग दोहोर्याए।