जेठ २८, काठमाडौं। सरकारले राष्ट्रिय खेलकुद परिषद् (राखेप) को उपाध्यक्षमा पूर्व राष्ट्रिय फुटबल टोलीका गोलकिपर विशाल श्रेष्ठलाई नियुक्त गरेको छ।
शिक्षा तथा खेलकुद मन्त्रालयको मन्त्रीस्तरीय निर्णयबाट श्रेष्ठलाई खेलकुदको सर्वोच्च निकाय राखेपको उपाध्यक्षको जिम्मेवारी सुम्पिएको हो।
लामो समय नेपाली राष्ट्रिय फुटबल टोलीको भरपर्दो गोलकिपरका रूपमा रहेका श्रेष्ठले खेल जीवनमा उल्लेखनीय योगदान पुर्याएका छन्।
केही वर्षअघि मात्रै अन्तर्राष्ट्रिय फुटबलबाट सन्यास लिएका श्रेष्ठ अब खेलकुदको नीति निर्माण र नेतृत्वदायी भूमिकामा देखिने भएका हुन्।
यसैबिच, मन्त्रालयले राखेपको बोर्ड सदस्यहरूमा विभिन्न खेल विधाको प्रतिनिधित्व सुनिश्चित हुने गरी अन्य चार जनालाई पनि नियुक्त गरेको छ।
नियुक्त हुनेहरूमा पूर्व अन्तर्राष्ट्रिय क्रिकेट खेलाडी तथा चर्चित प्रशिक्षक शक्ति गौचन, टेबल टेनिस खेलाडी सिक्का सुवाल, बुद्धिचाल (चेस) खेलाडी मोनालिसा खुम्बु र फुटबल खेलाडी पवन शाही रहेका छन्।
मन्त्रालयको यस कदमलाई खेलकुद प्रशासनमा अनुभवी र पूर्व खेलाडीहरूको सहभागिता बढाउने सकारात्मक प्रयासका रूपमा हेरिएको छ।
नवनियुक्त पदाधिकारी तथा सदस्यहरूले नेपाली खेलकुदको चौतर्फी विकास, चुस्त व्यवस्थापन र नीतिगत सुधारमा महत्त्वपूर्ण भूमिका खेल्ने अपेक्षा गरिएको छ।
प्रतिक्रिया
सम्बन्धित खवर
