साउन २१,हेटौंडा। मकवानपुरको कैलाश गाउँपालिकामा खोलाले बगाउँदा एक युवक बेपत्ता भएका छन्। हिजो बुधबार राति करिब ११:०० बजेको समयमा कैलाश गाउँपालिका वडा नं. ४ सिसैटा बस्ने २५ वर्षीय प्रकाश तामाङ र सोही ठाउँका ३२ वर्षीय अशोक प्रजा कालिकाटारबाट देउतीसतर्फ आफ्नो घर जाँदै थिए।

सो क्रममा मनहरी खोला तर्ने बेला अचानक आएको बाढीले दुवै जनालाई बगाएको थियो।

​घटनालगत्तै २५ वर्षीय प्रकाश तामाङ भने खोलाबाट सकुशल बाहिर निस्कन सफल भएका छन् भने ३२ वर्षीय अशोक प्रजालाई बगाएर बेपत्ता बनाएको र हालसम्म उनी सम्पर्कमा नआएको प्रहरीले जनाएको छ।

​घटनाबारे आज बिहान ९:१५ बजे प्रहरी चौकी भार्तामा जानकारी प्राप्त हुनासाथ प्रहरी चौकी भार्ता, प्रहरी चौकी चैनपुर र इलाका प्रहरी कार्यालय मनहरीबाट खटिएको संयुक्त प्रहरी टोलीले स्थानीयबासीहरूसँग समन्वय गरी बेपत्ता प्रजाको खोजी कार्य तीव्र पारिएको र घटनाबारे थप अनुसन्धान भइरहेको प्रहरीले जनाएको छ।

​वर्षायाममा यस्ता दुर्घटनाबाट बच्न पानीको बहाव राम्ररी हेरेर मात्र खोलानाला तर्न, अँध्यारोमा खोलानालाको बाटो सकेसम्म प्रयोग नगर्न तथा मौसमको अवस्था बुझेर मात्र यात्रा गर्न सम्बद्ध सबैमा प्रहरीले अनुरोध गरेको छ।