भदौ ७, हेटौंडा। हेटौडा उपमहानगरपालिका-४, कमलडाँडामा साइकल अनियन्त्रित भई पल्टिँदा दुई बालिका घाइते भएका छन्।
प्रहरीका अनुसार, आज दिउँसो करिब १४:२५ बजेको समयमा कमलडाँडाको ओरालोमा हेटौडा-४, नेपालचोक बस्ने बिनोद थापाकी १२ वर्षीया छोरी विशाखा थापाले चलाएको साइकल अचानक अनियन्त्रित भई पल्टिएको थियो।
दुर्घटनामा साइकल चालक विशाखाको नाक, बायाँ कान र मुखमा चोट लागेको छ भने उनको अवस्था मध्यम रहेको छ। त्यस्तै, सोही साइकलमा पछाडि सवार सलिना तामाङकी १३ वर्षीया छोरी आईषा तामाङको टाउकोमा चोट लागेको र उनको अवस्था गम्भीर रहेको प्रहरीले जनाएको छ।
घटनालगत्तै वडा प्रहरी कार्यालय हेटौडा, मकवानपुरबाट खटिएको प्रहरी टोलीले घाइते दुवै जनालाई उद्धार गरी हेटौडा अस्पताल पुर्याएको थियो।
हेटौडा अस्पतालमा सामान्य उपचारपश्चात उनीहरूको थप उपचारका लागि दिउँसो ३ बजे चितवन रिफर गरिएको छ।
जसमध्ये विशाखालाई पुरानो मेडिकल कलेज, र गम्भीर घाइते आईषालाई नयाँ मेडिकल कलेज, चितवन पठाइएको छ। घटनाबारे थप अनुसन्धान भइरहेको प्रहरीले जनाएको छ।
प्रतिक्रिया
सम्बन्धित खवर
