भदौ १२,काठमाडौं। नेपालमा उत्पन्न प्राकृतिक विपद्का कारण जनजीवन प्रभावित भएपछि सरकारले देशभरका विश्वविद्यालयहरूका सबै परीक्षा तथा शैक्षिक गतिविधिहरू तत्कालका लागि स्थगित गर्न निर्देशन दिएको छ।
शिक्षा तथा खेलकुद मन्त्री सस्मित पोखरेलले विश्वविद्यालयसम्बन्धी ऐनबाट प्राप्त अधिकार प्रयोग गर्दै भदौ १३ गते देखि लागू हुने गरी सम्पूर्ण परीक्षा स्थगित गर्न सम्बन्धित विश्वविद्यालयका उपकुलपतिहरूलाई निर्देश गरेका हुन्।
प्राकृतिक विपद्का कारण विद्यार्थी, अभिभावक तथा आम नागरिकको जनजीवन नराम्ररी प्रभावित भएको वर्तमान विषम परिस्थितिलाई मध्यनजर गर्दै मन्त्रालयले यो कडा कदम चालेको हो।
यसअघि भदौ १२ गते निर्धारण गरिएका परीक्षाहरूमा विभिन्न कारणले सहभागी हुन नसकेका विद्यार्थीहरूका लागि पनि उपयुक्त समयमा पुनः परीक्षा सञ्चालनको व्यवस्था मिलाउन निर्देशन दिइएको छ।
निर्देशनअनुसार कार्यान्वयन गर्नुपर्ने मुख्य बुँदाहरू:
- परीक्षा स्थगित र पुनर्संरचना: सबै परीक्षा स्थगित गरी अवस्था सहज भएपछि संशोधित तालिका सार्वजनिक गर्ने।
- कार्यक्रम स्थगन: अत्यावश्यक बाहेकका सबै प्रकारका भेला, गोष्ठी, सेमिनार, सभा तथा अन्य सामूहिक कार्यक्रमहरू बन्द गर्ने।
- सम्पर्क र समन्वय: विपद्बाट प्रभावित विद्यार्थी तथा अभिभावकहरूसँग विश्वविद्यालय र शैक्षिक संस्थामार्फत निरन्तर सम्पर्कमा रही आवश्यक सहयोग र सहजीकरण गर्ने।
- मनोसामाजिक परामर्श: विपद्का कारण असर परेका विद्यार्थी र आवश्यकताअनुसार अभिभावकहरूका लागि मनोसामाजिक परामर्शको व्यवस्था गर्ने।
- शैक्षिक निरन्तरता: विपद्ले अध्ययनमा पारेको क्षତିलाई ध्यानमा राख्दै विद्यार्थीको शैक्षिक निरन्तरता सुनिश्चित गर्न आवश्यक वैकल्पिक व्यवस्था मिलाउने।
विपद्को यो संवेदनशील घडीमा विश्वविद्यालय परिवारअन्तर्गतका विद्यार्थी, अभिभावक, शिक्षक तथा कर्मचारीको सुरक्षा र हितलाई सर्वोच्च प्राथमिकता दिन मन्त्रालयले अपिल गरेको छ।
प्रतिक्रिया
सम्बन्धित खवर
